Thursday, 26 November 2015

പനിയും ഞാനും പിന്നെ എഫ്.എം. റേഡിയോയും

കാര്യം നാട്ടിലെങ്ങും പാട്ടായിട്ട് വര്‍ഷങ്ങള്‍ ആയെങ്കിലും ഞാന്‍ എഫ്.എം. റേഡിയോ സ്വന്തം ഇഷ്ടപ്രകാരം കേള്‍ക്കുന്ന ഒരേയൊരു അവസരമേയുള്ളൂ. പനി പിടിക്കുമ്പോള്‍! വേറെ ആരുടെയെങ്കിലും ഒപ്പം വണ്ടിയില്‍ യാത്ര ചെയ്യുമ്പോഴോ മുടി വെട്ടാന്‍ ഇരുന്ന് കൊടുക്കുമ്പോഴോ കേള്‍ക്കേണ്ടി വരാറുണ്ട് എങ്കിലും അതൊന്നും എന്‍റെ താല്‍പര്യപ്രകാരം അല്ലല്ലോ. അപ്പോ എന്താണ് പനിയും എഫ്.എം. റേഡിയോയും തമ്മിലുള്ള ആ അവിഹിത ബന്ധം???

പനി പിടിച്ചാല്‍ ആദ്യം പണി കിട്ടുക കണ്ണുകള്‍ക്കായിരിക്കും. ഒന്നും വായിക്കാന്‍ വയ്യ, സിനിമ കാണാന്‍ വയ്യ, ഗെയിം കളിക്കാന്‍ വയ്യ. അതായത് പൊതുവില്‍ ഞാന്‍ സമയം കളയാന്‍ ചെയ്യുന്ന കാര്യങ്ങള്‍ ഒന്നും ചെയ്യാന്‍ ഈ നശിച്ച പനി തമ്മസിക്കില്ല എന്നര്‍ത്ഥം.

പിന്നെ ചെയ്യാവുന്ന കാര്യം പാട്ട് കേള്‍ക്കലാണ്. ബാംഗ്ലൂരില്‍ താമസിച്ചിരുന്ന സമയത്ത് യാത്രയ്ക്കിടെ കേള്‍ക്കാന്‍ വേണ്ടി മാത്രമായി ഏതാനും പാട്ടുകള്‍ ഫോണില്‍ സൂക്ഷിച്ചിരുന്നു. അവിടം വിട്ടപ്പോള്‍ ആ പരിപാടിയും നിന്നു. പുതിയ പാട്ടുകള്‍ എല്ലാം കേള്‍ക്കുമെങ്കിലും അവ യൂട്യൂബില്‍ നിന്നാവും സ്ഥിരം കേള്‍ക്കുക. അപ്പോള്‍പ്പിന്നെ പനി പിടിക്കുമ്പോള്‍ പാട്ട് കേള്‍ക്കണമെങ്കില്‍ നോ രക്ഷ.

അവിടെയാണ് എഫ്.എം. എന്‍റെ രക്ഷകനാകുന്നത്. കട്ടിലില്‍ കിടക്കുമ്പോ അടുത്തുകിടന്ന് അവനിങ്ങനെ പാടിക്കൊണ്ടിരിക്കും. ഇടയ്ക്ക് റെയില്‍വേ അനൗണ്‍സ്മെന്‍റ് പോലെയുള്ള പരസ്യങ്ങളും റേഡിയോ ജോക്കികളുടെ കലപില വര്‍ത്തമാനങ്ങളും സഹിക്കണം എന്നേയുള്ളൂ. പഴയ പാട്ടുകള്‍, പുതിയ പാട്ടുകള്‍, ഹിന്ദി പാട്ടുകള്‍, തമിഴ് പാട്ടുകള്‍ എന്നിങ്ങനെ ഈ ദുനിയാവില്‍ ഉള്ള ഏത് തരം പാട്ടും അവരിങ്ങനെ കേള്‍പ്പിച്ചുകൊണ്ടേയിരിക്കും. സുഖം പരിപാടിയല്ലേ! 

സംഗതി ഇങ്ങനെയൊക്കെ ആണെങ്കിലും പണി കഴിഞ്ഞാല്‍ പിന്നെ കൂരായണ എന്നതാണ് എഫ്.എം. ന്‍റെ വിധി. അത് മനസിലാക്കാനുള്ള കഴിവ് ഫോണിന് ഇല്ലാത്തത് കൊണ്ട് പിണക്കങ്ങളും പരിഭവങ്ങളും ഇല്ലാതെ അതിങ്ങനെ പാടുന്നു. പാടിക്കൊണ്ടേയിരിക്കുന്നു.