Wednesday, 25 November 2015

കുഞ്ഞുകുഞ്ഞ് പൊങ്ങച്ചങ്ങളും അനന്തരഫലങ്ങളും

കഴിഞ്ഞ ആഴ്ച അമലിന് പനി പിടിച്ച്, അതിന്‍റെ ഹാങ്ങ്‌ഓവറില്‍ നാശമായി നില്‍ക്കുമ്പോള്‍ ഞാന്‍ അവനോട് പറഞ്ഞു: "നിനക്കറിയാമോ എനിക്ക് ഇവിടെ വന്നിട്ട് ഇതുവരെ പനി പിടിച്ചിട്ടില്ല!. എത്ര തവണ മഴ നനഞ്ഞു! എത്ര തവണ വിയര്‍പ്പ് താണു! നാട്ടിലായിരുന്നെങ്കില്‍ ഇത്രയും നാളുകള്‍ക്കുള്ളില്‍ ഒരു രണ്ട് തവണയെങ്കിലും പനി പിടിച്ചേനെ!!!"

ഒരു പഞ്ച് കിട്ടാന്‍ സ്ഥിരം അടിക്കുന്ന ഡയലോഗ് ആണെങ്കിലും പറഞ്ഞു കഴിഞ്ഞപ്പോള്‍ വേണ്ടായിരുന്നു എന്നൊരു തോന്നല്‍. കഴിഞ്ഞ തവണ ഇതേ ഡയലോഗ് പറഞ്ഞത് ബാംഗ്ലൂര്‍ ആയിരുന്നപ്പോഴാണ്. അന്നും ഇത് തന്നെ സംഭവം. ഡയലോഗ് അല്‍പ്പം പഞ്ച് കൂട്ടിപ്പറഞ്ഞത്‌ കൊണ്ടാണോ എന്തോ, കൃത്യം ഒരാഴ്ച കഴിഞ്ഞപ്പോള്‍ നല്ല കിടിലന്‍ പനി. ഒറ്റയ്ക്ക് ആയിരുന്നകൊണ്ട് വെള്ളം ചൂടാക്കാനും ചുക്ക് കാപ്പി ഇടാനുമെല്ലാം എണീറ്റ്‌ നടന്ന് ആ പനി അധികം പണിയുണ്ടാക്കാതെ മാറിക്കിട്ടി.

ഇത്രേം ഓര്‍ത്തെടുക്കാന്‍ അധികം സമയം വേണ്ടായിരുന്നത് കൊണ്ട് ഞാന്‍ ഉടന്‍ തന്നെ അടുത്ത ഡയലോഗ് വിട്ടു. "പണ്ടിങ്ങനെ ഒന്ന് അഹങ്കാരം പറഞ്ഞിട്ട് പണി കിട്ടിയ അനുഭവം ഉള്ളതാ. മിക്കവാറും അടുത്ത ആഴ്ച ഞാനും പനി പിടിച്ചു കിടക്കുന്നുണ്ടാവും!" 

ദാ, ഇപ്പൊ സംഗതി സത്യമായി. ശരിക്കും ഞാന്‍ പൊങ്ങച്ചം പറഞ്ഞത് കൊണ്ട് "ഇവനിപ്പൊ അങ്ങനെ സുഖിക്കണ്ട!" എന്ന് കരുതി പനി പണി തന്നതാണോ അതോ പനി വരുന്നതിന് കൃത്യം ഒരാഴ്ച മുന്നേ എനിക്ക് പൊങ്ങച്ചം പറയണം എന്ന് തോന്നിയതാണോ, എന്നെനിക്കറിയില്ല. 

ദൈവദോഷം പറഞ്ഞാല്‍ നാക്ക് പുഴുത്തുപോകും എന്ന പഴയ അമ്മാമ്മ ലൈനില്‍ ഇനി പനിദൈവങ്ങള്‍ പണി തന്നതാണോ? എന്ത് തേങ്ങയാണെങ്കിലും എന്‍റെ ഉറക്കത്തിന്‍റെ കാര്യത്തില്‍ ഒരു തീരുമാനമായിക്കിട്ടി. 

അറിവില്ലാപൈതങ്ങളാണേ, ചെയ്ത തെറ്റുകള്‍ പൊറുത്ത് മാപ്പാക്കണേ. പനിദൈവങ്ങളേ, മാപ്പ്! ലേലു അല്ലു ലേലു അല്ലു ലേലു അല്ലു